Geus tilu poé mang Juhé eureun ngaboséh odong-odong ngurilingan dayeuh
Tarumanagara. Ti saprak manggih tabung oksigén ngagolér hareupeun
golodog. Sanggeus diulak ilik, tuluy diajaran maké selang keur ngeusian
balon palastik. Teu nyangka, balon eusi oksigén téh payu ka tatangga,
patatalépa antukna loba sémah nu ngahaja meuli paloba-loba. Tabung
oksigén eusi na teu béak-béak, jadi rejeki keur mang Juhé jeung anak
pamajikan. Ngan ti harita, warga dayeuh jadi kasiksa. Ngarénghap jadi
eungap. Hawa nyongkab matak peurih kana tikoro. Karasa seger deui mun
geus nyeuseup eusi balon mang Juhé. Mang Juhé ngadadak kakoncara, jadi
tokoh harepan keur lumangsung na kahirupan manusa.
Tabung jadi primadona, loba pihak nu niat ngarebut maké sagala rupa
cara. Bari ngusapan tabung oksigén nu geus teu mangrupa alatan
diparebutkeun ku politisi jeung gegedén nu teu boga rasa. Mang Juhé
meuncit eta tabung bari carinakdak. Tabung ngulahék, eusi na ngagelenyu.
Ngapung muru ka sawarga.
Tidak ada komentar:
Posting Komentar